不愛春天，實在太潮濕，我的類風濕在春天特別痛。而且春天很容易病的。
不愛夏天，實在太、太、太、太熱了。拍完一日外景，曬完一日，晚上回家一定頭痛。
不愛冬天，因為自有類風濕之後，冬天凍少少，骨頭會僵硬。簡單如坐在廁所小便，完事由坐廁企番起身都有點困難。最差的時候，起了床，腳已放了在地上，想要由床邊企起身都不能。要在床邊前後搖動身體借個力才站得起，有時來回幾次都要跌番落床。人人都說，在電視睇你真不覺那麼差。一來，起床骨頭硬化叫「晨僵」，大概三幾個鐘之後，活動能力又會高些。二來，拍電視時是會亢奮的，除了難度高的斬嘢，拿起個鑊，拿起個煲，或將一小煲水一手倒去另一個煲，全辦不到了。有一天，睇到數年前在Cable煮餸，吓？！乜咁犀利，雞又斬到，大煲單手拿起……只係短短數年，已變成一個九十歲老人！！！
講落，好似只有秋天可取。可惜一年只有三個月秋天，真的要好好珍惜。相信連秋天都不愛時，就快死得了！哈哈！
入秋已經好多好嘢食。蛇是其中一樣最愛。臘味是另一樣至愛，冬筍又係至愛，可惜我每次食冬筍都一定有朋友關心地或惡死地問：「你食得咩？！」真是多謝朋友們的關心：「乜我唔食得咩？」唉，朋友都是出於愛錫，食少一嚿半嚿又如何？！咪淨食一嚿半嚿囉！哈！冒死都要食少少。冬筍最好食係炆五花腩，第二係蝦子冬筍。蝦子冬筍就是難在買靚蝦子。
甚麼叫靚蝦子？（一）看起上來淡金黃色，深如咖啡色便不好。（二）聞起來香而不腥。（三）食起來淡口的少鹹，有些差品質的是又腥又鹹。
我以前買蝦子常要麻煩雲吞麵鋪幫我買，因為雲吞麵鋪用最多蝦子，鋪未必用最靚蝦子，但他們最懂得揀靚蝦子。自從在澳門知道「祥記麵家」有一瓶瓶蝦子，而且品質就如我說的靚蝦子，又睇得，又聞得，又食得。上品！我去「祥記」一定將她在門市的蝦子買光，帶返來香港益街坊。懂不懂煮餸我都送，不懂煮餸的，可煮麵，就簡單地放少許蝦子在面，全碗麵都活潑晒！又平，$85一瓶，最佳手信。

祥記麵家
地址︰澳門福隆新街68號
電話︰(853)28574310
營業時間︰11:30pm-12mn

（原文刊於2009年739期《飲食男女》）

蘇施黃Profile
資深電台人，天生異「口」，除了講嘢叻，食嘢同樣嘴刁，近年開咪、上電視做主持都不離教人食得精，吸引大批粉絲跟佢搵食

立即免費下載《飲食男女》App ： http://onelink.to/etwapp
《飲食男女》網站 ： http://etw.hk