郭晉安喺劇集《與敵同行》入面奸到出汁，連發哥周潤發都讚佢做得好，雖然安仔有份爭無綫台慶個視帝獎，不過佢嘅呼聲好似唔夠林峯同夏雨高。最近林峯俾人發現黐實高層樂易玲，另邊廂李司棋又話不屑有人做小動作，是非滿天飛。
噚日安仔喺大埔超級城宣傳《有隻僵屍暗戀你》時話：「珍姐（曾勵珍）有打畀我鼓勵我，佢都希望我得獎，我星期三約咗珍姐食飯，我唔介意成日食，呢個階段啲人特登影相做宣傳。」安仔呢句話，唔知係咪寸緊林峯呢？點知佢之後仲好抵死咁話：「平時喺公司同珍姐都有見面交流，或者我喺公司時，通知你哋嚟影相。」
至於同場宣傳嘅仲有動漫Maggie李曼筠、孟瑤同賈曉晨等一班《有》片演員，動漫Maggie同孟瑤忽然收起性感，不過穿緊身衫嘅孟瑤就現咗個小肚腩出嚟。

另外，林保怡噚日喺山頂出席活動講及食飯換獎一事，佢話以往都有同曾勵珍、樂易玲等食飯，佢仲事先張揚有份演出嘅《珠光寶氣》明年應該會有份角逐台慶頒獎禮，到時佢會約珍姐、樂易玲同陳志雲食飯，但絕對唔關換獎事。對於視帝一獎，保怡睇好夏雨同林峯，但就睇高夏雨一線。
至於夏雨日前就接受港台節目《舊日的足跡》訪問，佢講到明話恨做視帝，佢話去年攞唔到好失望，仲困咗喺屋企兩日唔想出街，反省有乜問題，但結果唔想講出嚟。夏雨又話得到網民支持係好大收穫，提到有好多fans支持林峯，佢都大讚林峯乖仔唱得又做得。夏雨仲話做得咁辛苦都係想有人認同，如果話唔恨獎嘅一定係黐線同埋虛偽。