現年57歲嘅名導金基德早前被爆涉性侵，甚至有疑似受害女星上節目《PD手冊》指控金基德性騷擾及性侵，不過金基德最終被判定無嫌疑，金基德反起訴該名女星誣告。今日就有報道指，雖然金基德被判無性侵嫌疑，但今次捲入性醜聞，令到佢嘅家人受到好大傷害，其妻已向法院申請與金基德離婚。

報道引述金基德嘅熟人指，雖然其妻相信金基德冇性侵，但其妻女因老公、爸爸嘅醜聞而同樣受到外界批評及騷擾，令佢哋唔想再以「金基德老婆」及「金基德女兒」身份再生活，所以決定離婚。據悉金基德嘅妻女已經賣咗位於坡州HEYRI藝術村嘅屋，搬到其他地方低調生活。

報道續指金基德嘅太太正聯絡律師進行離婚訴訟，同時有相關人士指，金基德嘅女兒亦受到好大衝擊，唔食安眠藥就瞓唔到覺。據悉金基德亦認為自己冇盡到應有嘅責任，令家人受到傷害，所以同意離婚。

更多韓流，喺晒《娛果》
http://fb.com/appledailyent