正所謂「出嚟行，遲早要還！」支持通過政改方案嘅民主黨，出年區議會選舉會俾泛民陣營狙擊。走上街頭冇幾耐嘅星屑醫生成立「選民力量行動」，準備專門挑戰民主黨低票當選嘅區議員，令出年區選戰情受注目。但查實狙擊民主黨只係短期目標，長遠嚟講佢哋仲要打散泛民主派嘅協調機制，希望日後有料嘅人就出戰，唔使一定由班大佬要計過度過有得贏嗰個先可以上陣。
雖然唔係創會成員，但據聞有份交流過同畀過吓意見嘅馬草泥任亮憲，今日都會以個人身份出席「選民力量行動」記者會，力撐一齊街頭抗爭嘅星屑醫生。任亮憲話「選民力量行動」會以狙擊民主黨07年區選低票當選嘅人做目標，民主黨大佬級人馬亦係重點出擊目標，原因係佢哋上屆選舉嘅核心政綱，係爭取2012雙普選，結果突然轉軚支持政改方案，於是要喺2011年「票債票償」。

目的瓦解協調機制

究竟邊啲人會上場挑戰打大佬？星屑醫生同袁彌明都係人選，目前搵緊合適地區落腳；至於會親身撐場嘅商業電台節目主持人潘小濤同唱片監製周博賢，據聞暫時都未有參選意欲，令選民又少咗選擇。
其實除咗區議會選舉，「選民力量行動」仲有個長遠諗法，就係徹底瓦解泛民陣營嘅協調機制。任亮憲雖然身在協調機制嘅社民連內，但佢非常反對協調機制，覺得無理由成班人圍威喂完就由小圈子決定出戰人選，質疑唔係有人有心就事成咩？
當然，泛民陣營唔協調好就各自派人出選，最終有機會令選票四散，最終建制派漁人得利。但任亮憲就話，議席對社民連嚟講從來唔係最重要，點解要唔理自己底線同民主黨「同流合污」？
查實馬草泥本身都係協調機制嘅「受害人」，據聞佢到家都未定獲分發邊區上陣，早前喺南區區議會補選一役，更加讓路畀公民黨司馬文，難免有啲勞嘈。佢引述前任幫主黃毓民日前都喺網上電台中表明反對協調機制，難得毓民認同，唔少黨友亦有相同諗法，所以考慮遲啲向社民連表達撤出協調嘅意願。

mailto:[email protected]