其實,喺《MSN》討論區度講明唔會買iPhone嘅網友,多數都係嫌貴。網友unxplained直言:「499蚊美金(約3892港元)實在貴到完全唔需要考慮!如果真係要買,都會等佢推出一段時間後、平番啲先再諗。」
wackychic就話:「3年後,話唔定iPhone會跌到200蚊,又或者同電訊公司簽兩年約,就可以用50蚊買機呢!」
SmarterThanEver就話,佢部iPod啱啱畀咗佢男朋友用,咁啱佢用開嗰個電訊網絡嘅合約又就嚟到期,所以打算轉台去Cingular,睇吓買手機有冇回贈,如果有,佢都會考慮買iPhone。
iPhone行貨6月會先喺美國推出,第四季輪到歐洲,香港就要明年先有,所以香港嘅機迷有大把時間諗吓買定唔買,或者睇吓啲外國用家嘅反應,再考慮都未遲。