第55屆金馬獎頒獎典禮因為最佳紀錄片獎得主，導演傅榆喺台上話：「希望我們的國家可以被當成一個真正獨立的個體來看待，這是我身為一個台灣人最大的願望」被指台獨，被大陸即時停止直播頒獎禮，事後亦有傳廣電總局唔准中資電影及合拍片再報名參加金馬獎（相關新聞： https://bit.ly/2ArD6tN）。

一班中港藝人紛紛表態「一點都不能少」，以保飯碗。大陸網民就繼續追殺，先係跳出嚟要封殺導演傅榆，唔理人哋根本唔喺大陸搵食。之後就追殺「餘黨」，火頭燒到唔係好關事嘅金馬主持陶晶瑩，有傳佢舉家搬去上海嘅計劃，已經因為網民封殺而打亂。

據台灣媒體報導，喺頒獎禮當晚陶晶瑩介紹評審團時，完全冇提到評審主席鞏俐。事後佢解釋係問過鞏俐本人唔唔想做訪問，強調「經過一再確認才不打擾她」。但係大陸網民就係唔理，將陶晶瑩同台獨掛鈎，要求各大電視台封殺佢。近年陶晶瑩將工作重心移往大陸，之前主持過《快樂男聲》、《蒙面唱將猜猜猜》、《真愛在囧途》等節目。目前手上有《妻子的浪漫旅行》、《童言有計》等工作。

有指陶晶瑩已準備畀兒女喺上海就學，自從台灣《女人234》節目停咗後，都有成半年冇擔任主持，o依家想移居大陸，但係工作未明，面臨進退兩難困境。不過陶晶瑩嘅經理人回覆傳媒時表示工作冇特別受到金馬獎影響，目前陶晶瑩正在休假，12月台灣會有新工作。

精選娛聞，喺晒《娛果》
http://fb.com/appledailyent