郭富城今日到澳門，為11月7日假全新場館「新濠影滙綜藝館」打頭陣舉行《郭富城舞臨盛宴夢幻距離演唱會2015(澳門站)》，舉行記者招待會，今次演唱會賣點之一，係加設搖滾站立區，亦是城城演唱會嘅首次，佢透露舞台設計及場館先進科技，令佢同觀眾作零距離接觸，甚至有機會拉觀眾上台一齊跳。

問佢擔唔擔心被抽水？佢話「我嘅舞台想有更多互動，畀人感受感染力量，以前都試過握手時被抓傷。」而今次整個流程及舞台設計都係只此一次。

見到城城左手無名指戴上戒指，問到係咪要恭喜佢？城城摸住戒指話：「大家誤會，係飾物，我可以除出來戴第二隻手。」講到係咪有成家立室念頭，佢話：「我心諗自己好希望將來有日成家立室，有小朋友，我都鍾意小朋友，但現階段工作好繁重。」

佢自言仍然想喺電影同舞台再創高峰，得到大家認同就成家立室，希望三年時間，但若果遇到好姻緣，佢話：「我都唔排除（閃婚），希望得到大家祝福。」