之前王祖藍接受港台節目《星期三主場》，講下中國大陸對香港娛樂文化嘅衝擊，佢批評香港電影依家太著重本土，冇咗以前嘅國際視野，「似乎依家大家強調嘅『本土』，淨係香港，冇強調國際性，但反而依家內地市場越嚟越鬼仔化。」仲話鼓勵港人北上學習下，由大陸呢個窗口搵番香港失去已久嘅國際視野。

都係嗰句，當有政協明明三個仔女都喺美國留學，但提出「去殖」改街名喚起「香港人愛國心」；又或者有啲老闆急不及待「去港味」、拍片迎合大陸億億聲嘅水份市場，令「香港」變得支離破碎，唔單止廣東話被逐步滅聲，就連講「本土」都俾人話係「港獨」……在這生死存亡之際，如果香港人仍然不重視本土文化，咁如何傳承？

但真係有人話：唔好！

已連續三屆連任全國政協委員嘅成龍，今日（6日）上午出席「全國政協十三屆一次會議文藝界別舉行小組討論開放日」，會後佢接受訪問，講及對電影市場嘅睇法，佢話：「中國電影走出去的大多是動作片，這不是真正的走出去，如果文藝片走出去，才是真正的走出去。我們有功夫，也有熊貓，但沒有《功夫熊貓》。」又話，好多大陸藝人去外國開騷，但呢啲唔係「走出去」，因為95%都係大陸人自己睇番。咁點樣先係「走出去」呢？「要拍出高水準的電影，要多和外國人合作。」好似好合理吖。

咁香港電影呢？成龍話：「只有一種電影，叫『中國電影』，香港電影，也是中國電影。有些我們拍香港電影，只是拍給香港人看，但香港人也可以拍《紅海行動》給全中國人看。」更稱唔可以「狹義地」將大陸電影同香港電影區分開來，「全部都是中國電影，不同的是在於你拍的是面向本地的電影，還是中國電影，或者是國際性電影。」

「你要拍黃大仙（黃大仙三字成龍用粵語講），你可能只能在香港播，你來到中國票房一定會不好，人家不瞭解，但你拍一些宏觀一點的，國際性的，好像《紅海》啊、《戰狼》啊，你就會去到國際。」

雖遠必誅！