當年今日
關於我們

事業篇 忙到脫節

蘋果日報 2006/02/26 00:00


數無綫花旦拍劇數量,佘詩曼認了阿二怕且沒人敢認第一。過去一年,她先後拍攝《火舞黃沙》、《隨時候命》、《YummyYummy》和剛播完的《覆雨翻雲》,還有目前開拍中的《鳳凰四重奏》,到現時為止,合共一百五十集,緊接開拍的劇集尚有七十集。
日以繼夜工作的阿佘,平均一天睡不到四小時,纖纖瘦瘦的阿佘竟然撐得住,這個鋼條女鐵人,實在比起許多大男人還要捱得。
「唔想捱眼瞓」
阿佘說:「其實係意志,我都鍾意做戲,用咁多時間拍戲,係有犧牲,但都有收穫。我犧牲嘅係,可能比同年紀嘅人,對社會接觸弱啲,冇時間睇雜誌、上網,大鄉里未至於,但都有少少脫節啦,日日都係得幾個鐘頭瞓,唔係三個月,講緊係幾年,真係冇精力去望電腦,望見個電腦都流晒眼水。
「話犧牲家庭生活,又唔係嘅,就算唔做嘢,我媽咪都唔喺香港啦。由讀書開始,我已經一個人生活。愛情都會比其他人遜色,冇咁多姿多采,損失咗多啲機會,因為冇時間拍拖。做呢行嘅收穫,就係有滿足感、成功感、錢啦、名利,付出同收穫都成正比,但有血有汗㗎,可能有一日退出,唔想做娛樂圈,原因其實好簡單,就係唔想捱眼瞓,唔會係冇興趣,唔係悶。」
盼結婚生仔
「但我諗,有得選擇嘅話,會轉吓生活模式,做吓好老婆,做個好媽咪。我唔係最嚮往好美滿嘅家庭,但女人始終會係咁,呢個係定律。人生點都要試吓呢個過程,結婚、生仔都係另一種階段。」
其實阿佘算好運,夥拍過無綫所有一線小生,其中有三位男藝員,令她在演技上開竅,到現在她仍銘記於心。「撈家(羅嘉良)啦,拍《七姊妹》嗰陣有場戲好多對白,情緒又要好激盪,初頭我都掌握唔到,但佢用自己嘅方法教我,令我知道點樣去演嗰場戲。
「安仔(郭晉安)啦,幾年前合作拍電視劇《情牽百子櫃》,佢好快投入角色,會帶動到你變成劇中嗰個人。ChiLam(張智霖)都係好partner,有默契囉。三個都有共通點,都係好男人,三個都長情。」
撰文:朱倬誼
攝影:林德雄
化妝:江中平
髮型:[email protected]
服裝:MOISELLE
場地:王子酒店ICY餐廳
empty
郭晉安–引對手入戲
《情牽百子櫃》劇照
empty
張智霖–默契十足
《十月初五的月光》劇照