【武漢肺炎】認為NBA未必無限期停賽 阿勤或未能親身睇VC最後一次倒戈速龍
蘋果日報 2020/03/12 16:24
NBA爵士雷霆丘雨勤武漢肺炎Gobert
著名球評丘雨勤認為新聞稿所用的「use hiatus」一詞是指短暫中斷。（資料圖片）
NBA今傳出爵士球員確診武漢肺炎，而聯盟隨即暫停一切比賽，著名球評丘雨勤認為新聞稿所用的「use hiatus」一詞指短暫中斷，故今季NBA未必會無限期停賽。不過阿勤透露原已購買門票在4月觀看鷹隊作客速龍，現在或會錯過老將卡達（Vince Carter）生涯最後一次亮相多倫多的機會。
武漢肺炎疫情蔓延全球，NBA近日已傳出閉門完成餘下賽季的消息，故阿勤今早得悉NBA停賽後也不意外。他續指，感覺NBA打算在3月觀望疫情發展，因此未必會腰斬賽季：「因為NBA今次新聞稿係話「use hiatus」，呢個字對佢哋而言係短暫嘅中斷，未必係大部份媒體所指嘅無限期停賽。雖然大家未知幾時會復賽，但NBA暫時都會利用3月進行觀望，因為要進行隔離都要經過14至21日，所以NBA可能觀望緊。4月會唔會再展開，嚟緊NBA主席阿當施華（Adam Silver）應該會宣佈。」
若NBA最終取消餘下賽季，而卡達又於今季退役的話，身為速龍忠實球迷的阿勤覺得最可惜的，是未能親眼目睹這位43歲鷹隊老將在職業生涯最後一次在成名地比賽：「可惜在本身等佢喺美國時間4月10號同鷹隊作客速龍，亦會係卡達職業生涯最後一次喺多倫多亮相，波飛都安排好晒，諗住去見證歷史一刻，但家陣都未知比賽能唔能夠如期舉行。」
幾乎每日都會為體通天下講波的阿勤直言，疫情必然對工作帶來影響，但將為人父的他表示可趁這段時間陪伴家人，迎接女兒誕生。他亦盼望疫情盡快受控：「2020年頭3個月，我相信對所有籃球迷都太震撼，希望否極泰來，大家健康平安。」
另外，不少球迷得悉NBA停賽後，紛紛向體通天下查詢「NBA通行證」的退款安排；體通天下則於官方fb回覆：「我們正在等待NBA對餘下賽季安排的最終決定。待NBA決定後，我司會作出相應安排，請密切留意我們官方網站及Facebook的有關通告。」
記者：許嘉明
阿勤覺得最可惜的，是未能親眼目睹這位43歲鷹隊老將在職業生涯最後一次在成名地多倫多比賽。