【催淚的滋味】Sammi《花椒之味》感人親情戲 被愛觸及變喊包
蘋果日報 2019/09/07 22:14
鄭秀文愛賴雅妍花椒之味
攝影：沈健程
鄭秀文、賴雅妍和麥子樂演出的新戲《花椒之味》晚上在九龍灣舉行慈善首映，譚耀文等人捧場，Sammi與歌手吳少芳老友，更找對方整了辣椒醬在場義賣：「我知道佢唱歌同煮嘢食都好叻，所以請佢做花椒味辣椒醬做慈善，我覺得好有意思，但我煮嘢食唔及佢咁叻，如果要合作都係唱歌好。」來自台灣的賴雅妍也會吃辣，反而Sammi笑謂食麻辣火鍋後屁股會感到熱辣辣像着了火。
戲中講述家人之間感情，二人做姊妹，Sammi謂這套溫情戲十分催淚，很多人看過優先場也哭，剛與老公許志安歐遊回港，問到安仔有否看後也哭？她說：「呢套戲講好多家人關係，一家人點樣從磨擦之後互相原諒，同放低過去，尤其係雅賢同母親一段感情線好感人，最尾一幕會觸及某種愛，我都忍唔到（喊），而且而家世界需要更多愛。佢（安仔）未睇，女仔會易喊啲，我都易喊，但唔算係喊包，拍嗰陣同配音我都有喊。」
而賴雅妍指自己跟家人關係很好，很珍惜家人，反而戲中要跟母親吵架，所以拍戲時也有點困難，拍這戲之後更加懂得要珍惜家人，會常打電話跟母親傾偈：「小時候性格比較男孩子，會跟男生打架，母親感到頭痛因為我很野蠻，從小她就不放心我，工作後較放心了。」而她以前會感為何母親常常管束自己，會有點反叛。
戲中演廚師的麥子樂自言愛下廚，最叻煎牛扒及煮磨菇湯，暫時只曾煮湯給母親、佘詩曼和周家怡品嚐：「我唔會突然約個女仔煮嘢佢食，工作為主。男人識煮嘢食幾好，好多時係阿媽教我，但暫時我冇諗過開餐廳，將來先算。」另外，譚耀文與Sammi同屆新秀出身，二人一直有聯絡，但暫時未試過合作拍戲：「識咗佢30幾年，知佢為電影付出好多，所以嚟捧佢場，加上監製邀請我嚟。」Sammi曾表示很多男士看這戲後也哭，他笑指自己感情豐富：「我都易喊，如果有需要，就用我條呔（抹眼淚）。」稍後，他會拍搞笑片，平時照顧小孩掌握到氹人歡笑技巧：「我幾戇居㗎，反而扮惡嘅角色唔係自己。」
Sammi晚上首映後與老闆林建岳及數名友人在中環食晚飯，一行人於晚上11時左右離開。
鄭秀文、賴雅妍和麥子樂演出的新戲《花椒之味》晚上在九龍灣舉行慈善首映。
Sammi自認平時易喊但不是喊包今次拍的時候都有喊。
為配合電影名，Sammi請吳少芳炮製了花椒味辣椒醬做慈善義賣。
賴雅妍平時很珍惜家人，反而戲中要跟母親吵架。
Sammi說電影內容催淚，譚耀文說可以用呔抹眼淚。
麥子樂在戲中演廚師，現實中最叻煎牛扒及煮磨菇湯。
首映後Sammi在中環食晚飯，約於晚上11時左右離開。（攝影：徐錦池、孔志豪）