喺過去星期六場西甲，雖然華倫西亞作客以1:2不敵皇家馬德里，但出晒名撲12碼勁嘅華倫門將迪亞高艾維斯又建奇功，救咗基斯坦奴朗拿度嘅12碼出嚟。今季西甲，艾維斯已經救咗六個12碼出嚟，成為西甲史上單季救12碼最多嘅門將。

雖然話12碼一係入，一係唔入，但射12碼嚟講，入嘅機會始終較大，因為射嗰有主動權喺手，兼且個龍門咁大，假如射上三路的話，通常門將都難救得到，所以喺比賽中博到球12碼，都可以話等於入咗七八成。不過，凡事都有例外，例如你面對嘅門將叫迪亞高艾維斯。呢位來自巴西嘅華倫門將出晒名撲12碼，佢喺上周六西甲，撲出C朗嘅一球，今季聯賽加埋撲咗六球出嚟。除咗C朗，基沙文、卡路士韋拿、基比、阿歷施文洛斯基同埋法積亞都喺艾維斯手上飲恨。今季西甲得兩個人嘅12碼入得到艾維斯，分別係美斯同埋伊巴嘅阿祖安干沙利斯。

艾維斯撲出C朗呢球12碼，仲破埋紀錄，成為西甲史上單季撲出12碼次數最多嘅球員，之後嘅紀錄係五次，由連拿同埋Manzanedo所保持，其中連拿喺03/04球季效力維拉利爾嗰陣平咗Manzanedo喺86/87球季所創嘅紀錄。自從艾維斯嚟咗西班牙踢波之後，撲12碼率係高過五成！佢救咗26球而被對手射入24球。另外，艾維斯都算得上係C朗射12碼嘅剋星，包埋今次，C朗職業生涯四次操刀12碼射艾維斯把守嘅大門，但竟然只係得一次射得入。