54歲嘅關之琳(之之)，最近就接受咗大陸節目《魯豫有約》嘅訪問，剖白咗佢嘅感情世界，佢話人生經歷過幾段戀情，每個戀人都係佢嘅最愛，然而講到佢曾做第三者，佢就話自己從冇做過主動，對於傷害到人家，之之都感到後悔(新聞連結： http://bit.ly/2l3ipva )

事有湊巧，噚晚之之嘅舊愛黃家諾就俾《蘋果》獨家野生捕獲到，見佢同外籍新女友，十指緊扣嘅喺中環行街搵食。晚上7時許，家諾就帶住女友沿住伊利近街咁逐間餐廳睇吓門外嘅餐牌，由於當時下着毛毛細雨，家諾都好細心咁為女友舉起雨傘，仲拖實女友，恐防女友會跣親，認真抵錫呀！

行吓行吓，佢哋終於搵到心頭好，入咗一間名為山頂酒吧餐廳，仲喺門外撞到一對外籍友人，梗係要寒暄幾句啦。約一小時後，佢哋就食完飯離開，家諾嘅女友趁佢埋單嘅時候，就先行步出餐廳抽煙同講電話。但係心急見女友嘅家諾，行出餐廳時，竟然睇唔女友，仲一支箭咁走咗去中環登山扶手電梯方向，幸好佢女友眼名腳快，即刻急步追返家諾，之後佢哋就上咗的士返屋企喇！