楊千嬅早前同媽咪齊齊為銀行拍理財廣告，千嬅笑言第一次母女合作，兩個心情都緊張又興奮，更講到趁呢個機會兩母女更深入了解對方，分享吓兩代母親唔同理財經驗，千嬅笑阿媽要拍廣告，第一個問題係問「靚唔靚㗎」，仲為咗出鏡去咗美容院，務求以最佳狀態示人。

喺廣告入面，除咗千嬅媽出鏡，原來囝囝Torres都拎咗佢幾張畫作為廣告獻出第一次!

講到囝囝喺電視見到佢哋拍廣告會有咩反應，千嬅笑言：「Torres應該會覺得好有趣，然後會問點解冇佢份一齊拍攝。」千嬅媽咪就眼泛淚光表示呢個係一個好好嘅memory，問到千嬅咁多年成長中，由歌手、結婚、生仔，邊件事令佢最開心，千嬅媽咪就話：「當然係有BB啦，不過呢件事同樣令我好擔心，因為知道佢工作辛苦，當時仲要開演唱會，好擔心佢會應付唔嚟。」