當年今日

願望進軍荷李活

蘋果日報 2002/01/27 00:00


現年二十五歲的趙薇,自幼便與父母及胞兄感情很好,不過最近所遇到的不快事,她卻未有跟家人傾訴。趙薇解釋說:「我好錫屋企人,有開心嘅事,我會同佢哋分享,但唔開心嘅事就盡量少提,我怕佢哋會擔心,因為父母年紀已經好大啦!好似呢件事,我都同佢哋講話『冇嘢!冇嘢!』唔想佢哋承受埋我啲工作壓力。
「其實我要多謝父母一直畀我好大嘅自由空間,管教唔算好嚴,所以我從來唔會感受到任何來自家庭嘅壓力,可能因為我可以喺一個健康、幸福家庭成長,先至培養出樂觀、和平嘅性格。我喺娛樂圈咁多年,最怕有是非,從來唔會同人爭。」

分裂人格演戲
在北京電影學院畢業的趙薇,對演戲很有熱誠,但她從未想過自己能夠紅遍東南亞,趙薇說:「可以有今日嘅成就,我覺得自己好幸運,以前只喺內地發展,唔會有明星嘅感覺,因為內地藝人同香港藝人感覺好唔同,喺內地做藝人,就算點紅,喺條街上面行,人哋都當你係一個普通人,但香港就唔同,啲人目光會奇怪啲,總之會令你覺得自己係一位明星,所以平時唔鍾意化妝嘅我,喺香港出街,係咁意都要化少少妝。」
趙薇選擇以演戲為終身職業,目前她最希望演繹的角色,原來是精神有問題的人。趙薇笑說:「我認為基本上每個人嘅潛意識,都應該有啲精神分裂,演呢類角色我覺得幾有挑戰性,平時我都好鍾意研究心理學,我哋做演員嘅,投入一個角色嗰陣,要分裂另一個性格出嚟,其實都幾有難度。」
《少》片美國發行
每一位亞洲演員都渴望揚名荷李活,趙薇亦不例外,她主演的《少林足球》,今年四月將會在全美國發行,而亞洲哥倫比亞投資的《夕陽天使》,稍後亦會排期在美國上映。
「要進軍荷李活市場,唔一定要拍講英文嘅西片,當然我都好希望遲吓喺美國上映嘅兩部片,可以令我打開國際知名度,如果唔係,我都會隨遇而安。」

後記
訪問趙薇前,《天下無雙》的宣傳大員已再三叮囑,希望不要提到趙薇穿日本軍旗服及淋糞事件,擔心她會感到難堪。不過,在整個訪問過程中,趙薇對所有提問都未有刻意迴避,只是問到她在遇襲後哭過多少遍時,筆者見她已忍不住眼泛淚光,身旁監視着的宣傳人員也緊張起來。畢竟傷口不小,看來趙薇要完全康復,仍尚待時間治療。
撰文:陳月媚 攝影:仇志德、馬啟然