由李昇基、車勝元、吳漣序等人主演嘅tvN新劇《和遊記》上周六首播後是非不斷，除咗第二集中多次出現穿崩鏡頭外，前日就有報道指其中一名工作人員A某日前懸掛喺天花板上嘅吊燈時，不慎由3米高墮地，導致腰及盆骨骨折及脊髓受傷，甚至曾出現下半身痲痺及沒有意識嘅狀況，引起外界爭議。

噚日，「全國言論勞動組織」就要求電視台要停止製作《和遊記》，以及要徹查A某受傷事件後才可重新製作。而今日就有報道指，韓國僱傭勞動部今日晏畫去到為於京畿道安城嘅拍攝場地進行調查，同時勞動部喺現場檢查裝置是否安全，以及會否有引起其他工傷嘅危險。勞動部之後會根據調查結果，對劇組作出「終止製作命令」或「加強現場措施後方可繼續製作」，即假如勞動部覺得現場唔安全，《和遊記》就要立即終止拍攝，不過就算未去到停拍咁嚴重，劇組都要加強安全措施先可以再開拍，同樣會影響到劇集嘅進度。

另外，A某嘅哥哥接受某電台節目訪問時，表示A某傷得好嚴重，醫生曾判斷A某有可能腦死亡，不過好彩A某已經恢復意識，可以睜開眼：「今早醫生向我哋講，雖然弟弟已經做咗手術，但依然要觀察下，假如有少少差錯，弟弟一世都郁唔到，只可以瞓喺床上。」A某哥哥續指弟弟依家搞成咁，成家人都好痛苦，就連姪女(A某女兒)都喊住唔敢去見爸爸一面。

同時A某哥哥又稱：「弟弟當時喺冇任何安全措施下上去天花板嘅吊燈，但未知係難以承受重量定質量唔好，導致弟弟跌咗落嚟。」隨後又表達對劇組嘅不滿：「事發後劇組只係書面發出道歉聲明就算，並冇實際聯絡過我哋。」

更多韓流，喺晒《娛果》
http://fb.com/appledailyent