近期負面新聞纏身嘅利豐（494），噚日宣佈，搵咗唐裕年做獨立非執行董事，董事袍金每年盛惠17萬港銀。
大家或者會問，唐裕年係乜水？最直接嘅答法，之唔係當今政務司司長唐英年嘅遠房堂細佬囉！間接啲嘅講法，就係同利豐主席馮國經再續前緣。

出任獨立非執董

實情為人低調，年屆59嘅唐裕年，背景大有來頭，佢係南海紗廠唐炳源之孫、唐驥千之子，三代都係喺美國麻省理工（MIT）畢業。
唐裕年畢業後，曾經喺花旗國嘅美國銀行打工，之後返家族企業幫手，到咗80年代中期，就拍住馮國經同埋梁家鏘，創立創業基金投資公司TechnoVentures。
後來，唐裕年轉職去獵頭公司SpencerStuart，仲做埋亞洲區掌舵人，呢家美國公司專門為高級行政人員職位揀蟀，思捷（330）副主席鄭明訓同埋港鐵（066）主席錢果豐，都曾經喺度打工。
今次俾老友邀請做獨董，唔知退而不休嘅唐裕年，會提供乜嘢寶貴意見，幫利豐化解近排嘅不利新聞呢？