最近天氣開始轉涼，相信少咗人去船P，不過都要提醒吓大家去船P嗰陣，要注意嘅嘢。唔少人出海玩，都會用橡皮艇玩水上活動（俗稱「香蕉船」），大家又知唔知萬一大吉利是，坐香蕉船出咗事，要做啲咩呢？

民建聯周浩鼎今日喺立法會問咗條有關香蕉船嘅書面質詢。佢話家陣啲船主出租水上電單車畀人玩，係要攞牌，但係拖隻香蕉船呢類充氣式非機動船隻畀人玩，就唔使喎，咁又使唔使問政府批准呢？而萬一出咗事，係咪一定要向海事處通報呢？

根據運房局嘅答案就係，啲船主想拖隻香蕉船畀人玩，的確係要得到海事處長批准，否則最高罰5,000蚊，而一旦隻香蕉船出咗事，亦要係24個鐘頭內書面同番海事處講，包括時、地、人等，否則最高罰1萬蚊。而睇番2012年至17年呢5年內，未試過有船主遇事不報，但係就有5宗非法拖香蕉船。照咁睇，香港啲船主都幾乖，跟足規矩喎。