由周元同吳漣序主演嘅韓劇《我的野蠻女友》(野蠻女友)嘅韓國月火劇(逢周一及周二晚播出)，劇集由上月29號首播，每日播出兩集，今晚播出第15及第16集(即第八集)，港劇迷逢周一及周二晚上10時可於Viu app上同步追看繁體字幕中文版本。

《野蠻女友》劇情圍繞周元飾演嘅才子甄佑去咗清國進修三年後返回韓國，並誤打誤撞認識咗吳漣序飾演嘅惠明公主，其後周元做咗王子嘅老師，亦終於喺宮中得知吳漣序公主嘅身份。

此時宮中出現唔少有關吳漣序唔好嘅傳言，同時吳漣序仲逃出宮外尋找陷害佢媽咪嘅幕後黑手，而今晚播出最新兩集嘅劇情就講到周元鼓勵吳漣序返回宮中搵出幕後黑手，同時群臣長跪不起要求皇上廢咗公主，及要求皇上接受公主同大清聯婚。

皇上對於周元協助公主十分失望，仲唔畀佢再做王子嘅老師。另一方面，周元就唔敢對吳漣序講自己冇得做官職，只好講大話話皇上要佢好好反省，叫佢暫時唔好同公主來往。

吳漣序趁晚上就喺宮中追查母親被害嘅線索，周元叫吳漣序唔好咁做，費時之後被貶為庶人或被處死，不過吳漣序咁野蠻，佢點會聽入耳，周元最後亦妥協陪吳漣序潛入「春秋館」搵線索，點知就被飾演中殿嘅尹世雅知道，尹世雅仲馬上趕到「春秋館」想搵出公主嘅把柄，好在最後得尹素貞飾演嘅慈惠大妃協助先冇事。

由於周元同吳漣序苦冇線索，大妃最終亦勸佢哋收手唔好再追查下去，其間仲爆咗周元冇咗官職。吳漣序對於自己連累周元冇咗官職，不單冇安慰佢仲好刻薄咁話：「你既然都幫唔上忙，就唔好阻手阻腳。件事都同你無關事。」

原來喺10年前尹世雅陷害吳漣序嘅生母，話佢同其他有路，所以吳漣序就由10年前嘅事件開始追查內情。同時尹世雅就要求公主嫁到清國，點知吳漣序一口拒絕，仲話：「我已經唔係10年前嘅小姑娘。」

至於皇上亦同慈惠大妃傾談有關公主嘅婚事，大妃覺得公主成為眾臣嘅箭靶，認為公主嫁到清國亦唔係一件壞事。皇上去搵吳漣序談及婚事，不過吳漣序就堅拒成婚，仲話要搵到母后先，因為吳漣序深受母親仍然在生。不過眾臣就不斷要求皇上同意吳漣序嘅婚事，又話如果吳漣序唔聯婚嘅話，就有機會影響到胞弟元子(崔魯雲飾)被冊封做世子。

此時清國王子終於來到朝鮮，皇上冇得選擇下決定安排公主同佢聯婚，同時更任命周元做負責迎接，即係周元要睇住愛人出嫁。