【嘆慢板】與楊洛婷努力3年終「搞出人命」 準爸爸Tim輕鬆迎B
楊洛婷父親節Tim黃天翱dearjaneRebee'a
Dear Jane主音黃天翱(Tim)和索妻楊洛婷(Rebee'a)呢對恩愛夫妻,拍拖8年,2014年結婚,婚後3年,每夜不設房,都係想趕生B,今年終於得償所願,宣佈造人成功,Tim o依家同大家開聲呼叫:「我做爸爸喇!」
Tim今年以準爸爸身份感受父親節,感觸良多,佢接受訪問當日,仲諗起收到Rebee'a通知佢有咗嘅電話,佢話:「嗰日Rebee'a要搭飛機,臨上機前打畀我,講講吓佢叫我等陣,話醫院打嚟。5分鐘後,佢call返嚟,話我哋有咗BB。我仲記得,佢第一個反應係問我『我即係搭唔搭得飛機?』,我話唔知,叫佢問護士,佢哋話安全。其實嗰刻係冇咩感覺,我一個人準備瞓覺,佢又搭飛機,到我醒番時候,諗番起先feel到嗰種興奮,即刻打畀老婆,大家都好開心,嗰種好似等咗好耐,一樣好想要嘅嘢終於等到喇!又唔識驚,我覺得幾正!有時有啲人有BB會驚,嗰一刻,剩係feel到我哋大家嘅喜悅,興奮程度係超過100。」
Tim倒數迎接BB嘅大日子,咁正式做爸爸,佢有咩準備?「其實係有好多嘢要準備,但又唔會知要準備啲咩,最正係可以見步行步,慢慢學,點樣去迎接同照顧同BB,呢樣係一個好好經歷,冇嘢係會準備得晒,初頭諗會唔會話要買好多BB嘢?朋友話唔使住,頭幾個月都係同BB瞓,好彩有好多friend話到畀我知,抱住少少玩嘅心態、輕鬆心態,會令我同老婆生活會加添精采。」
通常第一胎嘅父母都患有「過敏症」,所有嘢都係緊張,話晒第一次做父母,但係呢對夫妻,B喺媽媽肚內已經6個月,但間BB房仲未準備好,Tim話:「係呀,我哋真係幾relax,冇咁緊張,我覺得係好,平時我老婆係一個好緊張嘅人,咩都要準備好晒,當然要執好間房,點都要,要執時候一定執好,我見佢執咗幾百條裙出來,好唔捨得,都冇辦法,香港地方細,迫住要間房,其實o依家開始慢慢會諗間房點樣佈置,感覺開始嚟,咁我幫吓手囉!」
作為一個音樂人爸爸,Tim又會點樣幫手?佢又想喺自己下一代嘅生命中,擔任一個咩角色?「我覺得我係同BB玩,我唔知點樣,到時先諗,我會覺得Rebee'a會係一個好好嘅媽咪,佢嘅細心程度、做人嘅習慣、生活態度,佢會俾到一個小朋友一個好好成長嘅環境。我覺得作為父母係扶持,教佢點樣學習。我發覺一樣嘢,識得自己學嘢,人生會豐富好多,應該佢哋嘅朋友,保護佢哋,亦唔需要俾佢知道,我哋保護佢哋,一定有一個概念,要做到80%幫到佢哋。」Tim又補充話:「畀到佢開心、安全感,可能某度上畀佢依賴到我,好難講話想做一個點樣嘅爸爸,等個小朋友自己學。」
咁會唔會想同個仔或者女一齊夾band呢?Tim話:「玩音樂係一定要,唔係一定要佢學樂器,可以聽歌,學少少琴,掂吓玩吓,因為玩音樂對佢哋嘅思維、腦部發展都會好,玩音樂都係一個好好表達自己嘅方法,佢一定會鍾意音樂,佢聽親嘈嘅音樂,個肚都會郁,係咁踢。之前Rebee'a嚟睇我啲騷,OK㗎!BB已經準備好晒!」
採訪:楊潔雯
攝影:林德雄
攝錄:馮嘉文
場地提供:Silver Cross