千嬅唱完第21首歌《親》之後，又開始說了:「頭先呢一首歌，我係未喺公開場合唱過嘅。大約係五年前，嗰陣我懷孕37周，入錄音室錄嘅。錄嘅時候好多感覺，林夕亦寫出我對下一代嘅期望。

「雖然今日佢（Torres）坐喺度，但佢應該未必知道一個媽咪做啲乜，但係佢到時應該睇到媽咪想講啲咩。

「而呢首歌我都想送俾我爸爸媽媽。」講到激動處，千嬅兩眼已紅，此時她連忙定一定神，續道：「人喺唔同階段，做唔同嘅嘢。做任何嘢應該要及時，要孝順父母，要好好對你嘅下一代。呢個係生存嘅任務。永遠都要互相相愛。」

大約十點半左右，千嬅爆咗句：「我依家要唱最後一首歌喇！」眾人「下」一聲，千嬅笑言：「我都已經唱咗28首歌喇喎！咁由頭倒轉唱過好唔好？」咁觀眾一定話好啦。千嬅反問：「乜你哋聽日唔使返工咩？係喎，聽日24號喎，但我要返工喎。」

講到呢度，千嬅又同大家講下佢嘅新髮型，佢話諗整呢個頭已經好諗咗好耐，因為佢想染金色好耐喇。「依家我唔係話自己好有自信心，只可以話有啲。但係我仍然保留我嘅紫色。到我花甲之年我都會保留少少紫色，因為我驚大家唔認得我。」

更多娛聞，喺晒《娛果》
http://fb.com/appledailyent