「優客李林」夢幻戲碼，只差一步！周五全英羽毛球賽男單8強，林丹喺首局大敗8:21下及時調整，反勝丹麥3號種籽艾素臣21:14、21:15，4強對手係同胞石宇奇，至於頭號種籽李宗偉就相對贏得輕鬆，直落兩局21:12、21:15淘汰中國嘅田厚威，但4強要惡鬥近況唔錯嘅中華台北球手周天成，未必咁易過關呢！

男單4強有中國內訌，但女單4強就冇晒中國球手，皆因4號種籽孫瑜喺8強苦戰3局下不敵日本少女山口茜止步。兩場女單4強戲碼分別係山口茜對泰國前一姐拉特查諾，以及新任中華台北一姐戴資穎惡鬥南韓嘅成池鉉。