牙買加喺今屆倫奧，繼續威盡田徑短跑項目，保特又連贏100米同200米，搞到美國名將劉易斯極度酸葡萄，仲發炮暗示牙買加有用禁藥㖭。呢番言論令到保特非常之唔高興，亦即時透露有興趣喺下屆奧運玩埋跳遠。咦？劉易斯當年除咗一、二百外，亦攞過4次奧運跳遠金牌，保特玩過界似乎係想向佢示威喎。
對於牙買加短跑運動員成績咁好，劉易斯將矛頭直指保特，話佢突然進步得咁快，係儍佬先會覺得冇問題；保特就隨即還擊：「我對劉易斯嘅尊重已經全部冇晒，佢嘅言論只係純粹想引人注意，因為已經冇人再理會佢。」

保特衞冕到一、二百米，成就前無古人，而展望2016年巴西里約熱內盧奧運，保特咁鬼馬，當然想再搞吓新意思啦；佢話：「如果可以，我想成為歐文思。」已故美國田徑名將歐文思，喺36年柏林奧運贏咗一、二百米同跳遠金牌，保特都希望可以做到：「跳遠係我一直都希望參加嘅項目，我已經成為傳奇，下一步要諗吓點樣繼續驅動自己向前，跳遠會係我嘅新目標。要贏3面個人金牌係好難嘅任務，因為到咗下屆奧運我已經30歲，但我冇打算退下來。」
劉易斯喺84年奧運，都贏咗100米、200米同跳遠金牌，之後開始唔夠人跑，就慢慢專注喺跳遠度，打後88到96年，拎多3屆奧運冠軍。保特話要玩跳遠，睇怕多少都係因為要證明畀劉易斯睇，你做到嘅我都做到。