憑着參與大台《超級巨聲2》加入娛樂圈、於2013年推出首次單曲正式出道嘅陳慧敏（慧敏哥），啱啱推出第3張個人專輯 《一粒嘢》，顧名思義「一粒嘢」 係佢嘅另一個稱呼，日前慧敏哥現身觀塘接受《蘋果》專訪，講到以前其實對自己冇乜信心：「我曾經覺得自己好細粒，好介意人哋點睇。」

直到後來慧敏哥開始改變睇法，覺得用「粒」嚟形容佢非但唔係貶低，仲相當貼題，佢話：「唔少朋友見到我細細粒，一個人由澳門嚟香港發展，出騷表演都係自己一腳踢，覺得我好似一粒電池咁，人仔細細但好有力量，慢慢令我接受呢種睇法。」

於是新專輯索性取名《一粒嘢》算係一種身份認同吧？慧敏哥話：「一粒種子，可以係萬物之始。」所以佢喺專輯內更附送一個小盆栽，希望歌迷聽歌之餘，亦可以感受一粒種子嘅變化。

嚟緊11月，慧敏哥就會喺旺角麥花臣舉行佢嘅首個音樂會，佢話：「最想請以前巨星幫嘅一班隊友，同埋小肥嚟玩，佢哋咁多年嚟真係幫咗我好多。」