男神唔怕多，有心有力就最好不過！傘運後成立嘅法政匯思，日前舉行會員周年大會，改選新一屆核心領導層同召集人，15個核心小組成員中有6個人係新加入；而喺核心外圍嘅八方，則更關注召集人中有冇男神？皆因上屆三位召集人之一嘅梁允信雖然繼續做核心小組成員，但決定唔尋求連任，女粉絲相信好希望續有男神接班。
結果係……除咗文浩正同任建峰連任召集人，另一位召集人就係大律師蔡騏嘞！擔任鍵盤戰線法律顧問嘅蔡騏較為人熟悉嘅，梗係成功打咗場反「網絡23條」嘅硬仗，而身為公司法律顧問，對資訊科技、知識產權同私隱相關法律熟悉嘅佢，男神級外形亦受注目！

法政匯思就形容佢係社運界內其中一個被視為既有政策游說經驗、亦對法例草擬過程有一定程度熟悉嘅領袖。原來蔡騏係喺法政匯思成立後約兩個月加入。八方問過現年38歲嘅佢，佢話接任召集人壓力好大，笑稱：「上任Wilson（梁允信）咁靚仔、老婆又咁靚，我全部都唔qualified喎。」講笑完都認真講番，佢話希望喺社會咁多歪理下，繼續發聲捍衞真理，要似Wilson咁敢言，未來可能主打網絡安全等較熟悉議題。知唔知外界封佢做男神？佢謙虛咁話：「我又唔係標青、又唔係靚仔，都有啲尷尬㗎！」

李八方

mailto:[email protected]