當年今日
關於我們

魚樂無窮:信德折讓勁要睇實 - 唐牛

蘋果日報 2011/09/14 00:00


港股今個中秋節特別快「落」,星期一埋單跌咗800幾點,真係食咩月餅都冇味。由於個市仲係搖搖欲墜,唐牛寧願做功課搵筍嘢,等個市定番先入場都唔遲,今日就講吓信德(242)。
信德主要經營港澳地產同埋船務,今年上半年賺2.2億銀,倒退18%,如果撇除投資重估收益,純利只係得3500萬銀,表面上睇冇乜吸引力。不過,該股每股資產淨值達7.08元,用星期一收市價3.95元計,足足折讓44%,超值到暈。揸Fit人何超瓊仲講到明,旗下澳門文華薈物業同埋永念庭骨灰龕收益,下半年會陸續入賬,到時盈利定必水漲船高。
信德上半年運輸業務蝕咗5900萬銀,主要因為燃油價格高企,不過,噴射飛航船票價下半年已經加價,加上早前收購埋新世界第一渡輪同新渡輪,成功統一港澳客輪業務,喺協同效應下,相信嚟緊會有一番新景象,戰友們可多加留意。
唐牛