若論今晚賽事焦點誰屬，重使問？梗係屬於英超大戰：紅魔鬼火併藍戰士啦！論近況，曼聯過去一周表現遜色，聯賽作客米杜士堡一比四慘敗；周中歐冠盃分組賽○比一負主場的里爾，分組出線機會大受影響。
外界對曼聯搞到今時今日嘅狀況眾說紛紜；有的說費爵爺剛愎自用，令到自己眾叛親離，先後賣走史譚、華朗及碧咸等重心球員，削弱球隊實力；有的說近年球會青訓失敗，未能為球隊補充優質新血，出現青黃不接。另一方面，若論陣容：由史高斯、阿倫史密夫、費查等組成的中場線要面對林柏特、艾辛及馬基列尼等實在是難以取得優勢。論士氣，曼聯隊長堅尼近日曾公開批評部份隊友場上表現不夠水準，一再證明主隊軍心不穩。