【新增動新聞】

今年NBA總決賽已經喺香港時間星期五打咗第一場，勇士喺主場以113:91大勝騎士，暫時領先1:0，雖然第二場比賽要去到下星期一（美國時間星期日）先至打，不過喺Game 1得分唔係最多但射入咗6球三分波、全場拎到28分嘅「咖喱仔」史堤芬居里就依然係焦點所在，事關佢喺第三節尾段一次射入咗三分波之後，學隊友祖蒙特格連咁踢腳，結果成為咗網站嘅惡搞材料。

話說當時「咖喱仔」喺騎士嘅JR史密夫面前射入咗球三分波之後，就學好鍾意出「撩陰腿」踢腳嘅格連咁樣起腳踢吓踢吓，有網站就整咗條惡搞短片，短片最後係「咖喱仔」將個籃球一腳踢去K.O.勒邦占士。至於「咖喱仔」點解釋佢嘅踢腳動作呢？其實賽後佢被問到點解會咁樣慶祝時，答案就係︰「我對鞋好輕。」原來都係為咗宣傳佢對UA新鞋Curry 4，真係用心良苦！