謝婷婷今日喺澳門新濠天地舉行嘅池畔派對SPLASH，大會安排兩個大隻沙灘男同佢合照，兩個大隻男抱起婷婷，不過佢就猛話好跣，於是大隻男唯有急急放低佢，呢個親近靚女嘅機會，大約只係維持咗10秒。

雖然婷婷去池畔派對，但冇着泳裝，只係以吊帶連身長褲現身，記者笑言好失望，佢話：「sorry，咁我有底線嘛，如果拍戲就唔會，但係平日我去沙灘都係咁着0架。」

提到佢都被人影到着泳衣去遊船河，婷婷話：「好耐之前啦。」咁身材有冇變先？佢笑住話自己仲着得落中學條校服裙，條腰咁多年都冇發育過，哇﹗令人羨慕。

婷婷話自己成世人只係去過一次沙灘派對，而且冇飲酒，不過佢係好鍾意去沙灘。問佢係咪成日去遊船河？佢話平時會同成班女仔朋友去。有冇趁機識下啲型男？婷婷笑謂：「啲女仔朋友有帶男仔朋友去，不過個重點都唔係為咗咁。」

至於有冇帶過姪仔Lucas同Quintus去沙灘？佢話未試過，但嚟緊暑期如果佢哋喺香港，都會約見面：「佢哋仲有sendmessage話掛住我，幾個月前有喺香港見過，都唔算太耐。」

被問到會唔會叫埋霆鋒一齊同Lucas、Quintus去街？婷婷表示佢好似忙住拍第二輯《12道鋒味》：「佢好似被隻蟹夾親，我都係人哋話我知。」

問佢哋有冇個家人WhatsAppgroup傾偈？婷婷笑言：「我都好想有，但係我教唔到爹哋用，佢遲幾拍，連點樣飛線都會忘記。媽咪就鍾意用sticker，佢會一次過send好多sticker黎，新年嗰啲仲會畀錢買，重要嘢先錄音。」