內銀大清查海航、復星、安邦、萬達嘅消息，搞到港股下晝人心惶惶，連續第二日出現震倉，不過震還震，龍頭騰訊（700）企得穩，冇負面影響嘅內銀亦有得升，反映市場算鎮定。呢啲大清查事件，如果係同以往嘅差唔多，往往經過各方澄清之後，大家慢慢當冇咗件事，市場就開始回穩。

兩日震倉兩次，嚟得相當密集，但連番震倉過程之中，唔受壞消息拖累嘅股份，就趁機一放絕塵，舜宇（2382）周三爆升已屬一例，騰訊（700）頭也不回，招行（3968）完全唔關內銀大清查事，股價收市升3.6%返去接近高位。喺整固市當中，熱門股多呈大漲小回之勢，整體大市每日有炒作主題，總有板塊破頂急升，而破完頂只係趁震倉適度回吐，似有資金逐步買貨，而非散貨。整體市況唔似見咗頂，反而更加美股化，由調整逐漸變成慢慢回升，好似升極都唔停咁。

喺整固市途中，心底裡要預咗隨時迎接震倉，近期要喺永續震倉嘅市況當中企得穩陣腳，一定要買中線趨勢向上嘅股，務求今次震倉捱得過之後，下次震倉就冇咁難捱，相信破咗頂嘅科網股，例如舜宇、IGG（799），反而係趁調整吸納，Lead得住就hold到收成正果，或許有唔錯收穫。

晉佳

掌握財經地產資訊，即Like「蘋果ATM」fb專頁啦！
http://fb.com/appledailyatm