今朝抵港嘅韓劇《奶酪陷阱》男星徐康俊,下晝3點現身銅鑼灣皇室堡出席簽名會,玩遊戲時佢背後熊抱女粉絲彈琴,又餵反串扮《奶酪陷阱》女主角洪雪嘅男粉絲食杯麵,場面甜蜜又搞笑。
徐康俊吸引近千粉絲企滿4層商場支持,佢一出場就以廣東話同大家打招呼,全場即刻用韓文同佢講「我愛你」,不過徐康俊一時間聽唔清楚,全場再講多次,令佢有啲怕醜又冧爆。
徐康俊自言同《奶酪陷阱》飾演嘅白仁浩有啲唔同:「我冇白仁浩咁火爆,唔會整爛車。」提到劇中佢飾演鋼琴王子,彈琴好叻,問佢係咪100%自己上陣?徐康俊說:「大部份係,除咗有啲比較難嘅classic曲目,其他曲目就拍攝前幾星期開始練。」又話拍攝同朴海鎮因誤會而友情變質,要打交嘅場面好心痛。
回想之前飛去東加拍攝綜藝節目《叢林的法則》,徐康俊坦言幾辛苦,因為人最基本嘅進食同沖涼都有困難,個身成日都黐立立。佢又透露自己好鍾意甄子丹,睇晒3集《葉問》,好想同甄子丹見面,仲即席擺出葉問耍功夫甫士。
玩遊戲環節時,粉絲要戴上假髮扮《奶酪陷阱》女主角洪雪向徐康俊示愛,其間有女粉絲同徐康俊擔埋同一把遮又索抱,徐康俊都冇托手踭。最搞笑係之後有男粉絲反串扮洪雪,幫徐康俊戴頸巾,徐康俊好開心,笑言好似見到真洪雪出現一樣。後尾徐康俊揀咗呢個粉絲勝出遊戲,仲餵佢食杯麵同頭貼頭影相,HeHe味濃。
另一個遊戲徐康俊就要彈琴畀粉絲估彈咩音,最後徐康俊捉實勝出粉絲嘅手仔教彈琴,之後佢再挑戰現場粉絲嘅心臟負荷能力,背後熊抱該名粉絲教彈琴,令全場叫到拆天。而簽名會完結時,徐康俊再用廣東話冧粉絲:「愛你。」