有啲港姐，靠爆粗上位。

有啲港姐，靠親民。

呢位，明顯係後者，仲係360度零死角。

靚到，就算出動《蘋果》照妖鏡，一樣咁靚。

佢係上月剛過29歲生日嘅朱千雪。

「作為女生的我覺得她普通」
「作為女性的我覺得一般，沒有那麼誇張。」

網民係咁講啦。靚唔靚，自己睇啦。

忙於拍劇嘅千雪BB，日前第一次開Live，為的是幫手宣傳新劇《踩過界》。當日劇中眾演員去到旺角造勢，千雪BB要開工嚟唔到，故事前就夾定到時開Live同現場chit chat。

千雪BB明顯好緊張，話晒第一次Live，於是當日一大早佢就靜雞雞試Live，擺咗盆花做「主角」，幾秒即cut。千雪BB好擔心，個Live會冇人睇。

結果，千雪懷住忐忑嘅心情，好驚驚咁開始佢人生第一個Live，第一句就係：「係咪Live緊呢？但未有人喎。」唔使驚唔使驚，話咁快就四百，之後好快已突破一千，最高峰仲有逾萬！

「有人讚我個妝好靚呀！我個妝化咗一半咋，化完仲靚呀！」仲好開心咁話：「好多人睇呀！好多人睇呀！」有人提議佢多啲開直播，佢話：「我都想呀！大家有乜嘢意見俾我呢？我覺得係……就咁對住個camera傾偈，定係搵啲friend上嚟傾偈吖？定係有啲乜嘢特別嘢做下會開心啲呢？因為我都想大家interested呀嘛。」又有點不好意思謂：「費事大家好似好悶咁啦。」然後又再展示燦爛笑容。

因為要開工所以去唔到宣傳，千雪BB好內疚，多次致歉解釋，又好緊張咁Mon實現場大夥兒幾時同佢connect做live……但一connect就發生故障，千雪BB唔知現場睇唔睇到佢，但仍然堅持Live落去，又笑言：「好似自己同自己講嘢咁！」