隔牆有耳:民主黨交假棒 - 李八方

蘋果日報 2008/01/20 00:00


香港政壇老化,近十幾廿年來來去去都係嗰十張八張面孔,民主黨噚日隆重其事,舉行薪火相傳交棒儀式,黨鞭華叔、黨主席何俊仁同前主席馬丁向多名30歲以下黨員交棒,勉勵佢哋要「接好民主棒,踏上長征路」。
大家唔使擔心,仁哥同馬丁唔係真係交棒宣佈唔連任立法會,將個江山交畀班後生仔,佢哋只係象徵式交棒啫,真正唔選嘅楊森反而冇出現。好彩民主黨唔係嚟真,八方都冇咁驚,民建聯就可能失望啲嘞。至於黨內元老幾時讓位,呢啲超敏感問題,問都冇答案。
民主黨又話,舊年區選傳媒集中報道佢哋慘敗,其實都有唔少「新星」贏得漂亮,包括22歲嘅趙家賢,係歷來最年輕區議員;元朗「大佬」張賢登雖然輸畀民建聯姚國威,但「小將」鄺俊宇卻擊敗民建聯陳兆基,兩黨打和啫。