謝安琪（Kay）今年3月誕女，休息到家吓，終於復工！

原定明年中有新歌出之後先至復出嘅人妻Kay，咁啱就係喺老公張繼聰被無綫封殺之後提早開工，用咗個半月速修身，今晚現身金鐘出席活動時依然有啲圓潤，身穿住黑色碎花長裙，一頭清爽短髮，暫未回復生B前最佳狀態。「今年多咗個成員，媽咪又喺聖誕節正日生日，所以喺邊度過都一樣咁開心，正日唔開工，一家人食飯，簡簡單單已經好開心。」

不過Kay澄清番，暫時未算係全面復工：「歌迷等咗我咁耐，好感動。本來諗住2018年中到年尾至復出，o依家揀吓歌先，傳媒好神通一早收到消息，即刻有客戶同商戶請我工作，有合適嘅工作就做住先，不過都比自己想像之中早復出。」

人妻Kay仲話，因為咁樣而有意外收穫：「個幾月前，大家影到我好肥。有工作就要加快步伐，用咗個半月做運動，同意志力去減，咁耐冇唱歌，需要好嘅狀態。」成績呢？「都瘦咗十幾廿磅㗎，體能亦好咗。如果明年復工，就冇咁的起心肝去做運動，o依家可以一家人去做gym，尤其阿聰係運動狂熱，以前佢無敵最寂寞，一個人去做gym，o依家有伴喇！」

更多娛聞，喺晒《娛果》
http://fb.com/appledailyent