日本男星赤西仁原本係尊尼組合KAT-TUN成員，但因為幾年前喺冇通知事務所之下，同黑木美紗奉子成婚，令佢被炒魷。由於尊尼事務所一向勢力大，被炒後嘅赤西仁亦冇乜工作，不過，好彩佢喺內地好多粉絲，上個月底仲宣佈咗會拍內地網劇《午夜計程車2》，日本有傳媒話日本各電視台知道赤西仁拍內地網劇之後都好有興趣，仲話可能有新商機。

日本傳媒話，赤西仁受到尊尼牽制住，可能冇日本電視台搵佢拍劇，但佢喺日本仲有大批粉絲好想睇佢演戲，佢拍嘅內地網劇，有好多衞星台或者收費台都有興趣當外購劇買番日本播，所以如果赤西仁繼續接拍內地劇，都有機會喺日本播，咁都係佢一個搵錢新商機。

赤西仁早排先至喺內地參加頒獎禮，喺佢微博上仲有同Angelababy、張震合照，睇嚟佢返內地搵人仔都應該有着數。