麗豐（1125）又係另一隻瞓覺股，1年嚟冇升過，一扎醒，不得了。麗豐最新NAV0.69元，現價折讓48%，就當乜都唔秤，祖國房地產股中，有咁吸引嘅折讓，十隻手指數得晒。又麗豐家陣坐擁廣州及上海土儲連發展中物業，上千萬平方呎，兼且計劃喺嚟緊三四年，分段落成，兼且推售或者出租。即係話，土儲及物業嘅價值，好快反映。齋計每方呎樓面，係咁意增值兩百蚊，麗豐講緊嘅總增值，都上22億銀，等如每股0.27元。麗豐現價，不過0.355元。
再講，呢期熱錢狂湧瞓覺股，同類莊中（298），對上短短9個交易日，嘭嘭聲最高翻一番，創出5年新高。麗豐家陣仲喺1年低位浮沉，話係龍尾股好，炒水尾又好，值博率奇高。
以麗豐1年高位0.52元做目標，潛在升幅46%；以麗豐翻一番見0.71元計，重秤後NAV折讓仲有30%，炒折讓，實情仲有大把水位。

洛鉬熱爆短炒亞鋯

洛鉬（3993）招股熱爆，趁洛鉬嚟緊呢個星期上市，短炒亞鋯（395）。亞鋯雖則同洛鉬唔同，但亞鋯主打業務，一樣係耐熱稀有金屬「鋯」相關化合物業務，已經有concept。又當亞鋯07年度PE同往績一樣，都係講緊9倍單位數水平。再講，亞鋯手頭淨現金高達1.39億銀，財政穩陣到爆。呢轉短打，博亞鋯升兩成到1.24元，PE都係10倍水位咁大把，但已經有魚有肉。
錢雋