【 老公會唔會呷醋?】劉德華唱23年前《情深的一句》 梁詠琪聽到喊
紅館演唱會梁詠琪劉德華烈火戰車
劉德華嘅紅館演唱會,唱到噚晚已經係第六場,除咗接近演唱會尾聲,有歌迷疑喺座位跳出台,令華仔同全場觀眾都嚇呆(新聞連結: https://bit.ly/2rPeirG ),整晚演唱會氣氛相當不俗,有去紅館捧華仔場嘅梁詠琪(GiGi),更加睇到流眼淚,大嗌好感動。
GiGi喺Ig貼咗條佢睇緊騷嘅片,當時華仔唱緊95年同佢合演嘅電影《烈火戰車》主題曲《情深的一句》。雖然GiGi同華仔偶有合作,但忽然回帶返去廿幾年前,搞到GiGi好感動,一邊聽一邊用手拍心口,眼濕濕咁話:「好感動!20年前喇,20年前我成個傻婆咁,o依家都係……!」
除此,GiGi亦有去後台搵華仔合照,仲喺Ig貼相留言晒命:「係呀你冇睇錯!我係摸住佢心口,佢係揸住我隻手呀!今晚在烈火戰車的23年後再聽到《情深的一句》令我想起戴住眼鏡的阿儀,同戴住頭盔的阿祖,特別感動!原來已經認識華仔23年,一直佩服你的做人做事的認真態度,是我一直非常尊敬的藝人,今日非常感謝你帶給我們這精彩的演唱會,和唱出《情深的一句》。」另外,劉嘉玲同前奧運體操冠軍級人馬李小鵬都係座上客。
精選娛聞,喺晒《娛果》
http://fb.com/appledailyent
GiGi聽到華仔唱《情深的一句》好感動。(網上圖片)