由趙祟基執導的電影《中英街1號》，把「六七暴動」重新呈現電影，但這不是一部紀錄片。有異於《消失的檔案》的是，這是一部「黑白片」，講三名來自不同家庭背景的年輕人，在上世紀60年代的香港，以及21世紀面對社會不公義，如何爭取發聲。所以，這是一個有關香港的故事。「我們看見歷史，即使並非重演，也似曾相識。」

導演趙崇基與《中英街1號》同名小說作家謝傲霜用四年時間搜集疏理資料，嘗試將六七暴動與香港近年社運連繫，但該片由開始籌拍到取景一直困難重重，由申請政府的電影發展基金，對300萬貸款原本都頗有信心批出，可惜最後回覆是「商業元素不足」。趙崇基曾說：「商業元素夠，我就唔使搵政府借錢，我搵林建岳或者林小明投資啦！」他稱從一些電影發展基金委員友人口中得知，有所謂的「藍絲」的委員，給《中英街1號》俾零分。

今次本片在大阪亞洲電影節摘下最優秀作品獎，亦是競賽部份中的最大獎項，可是能否在香港上映，仍是未知之數，故趙崇基導演昨晚出席電影節「香港之夜」時，亦一時感觸落淚。

獲獎後，趙崇基導演接受《蘋果》電話訪問時說：「我諗呢啲所謂嘅阻力，其實我哋最後都唔知係咪淨係因為政治嘅理由，我相信就算係，佢哋都唔會承認係一個政治嘅理由。咁所以對我嚟講，我覺得最主要係拍好部戲。

喺呢個時候，我受到其他嘅觀眾，或者外邊人嘅觀眾咁鍾意，同埋有一啲獎項嘅認可，呢樣嘢我覺得對我呢部戲喺香港上映可能有啲幫助嘅。我未至於好悲觀咁話香港一定上唔到，希望盡量爭取到。

一部香港嘅電影，一部咁本土嘅電影，冇理由唔以香港觀眾作為最主要觀眾、同埋以香港市場為最主要市場囉。我都希望香港嘅觀眾個個都睇到。

至於男主角游學修就說：「我知道佢行到呢一步非常唔容易。《中英街1號》唔算係一部抗爭電影，無反抗或者爭取任何嘢，只係關心兩個時代既人。我知香港依家社會風氣對呢啲嘢好敏感，但仍然寄望有日部戲可以俾香港人睇到。希望有助電影推廣，更多人留意，而大家嘅關注有助增大電影上映機會。」