神劇《太陽的後裔》喺亞洲各地咁受歡迎，當中劇中出現過嘅服裝、飾物、化妝品等都掀起一股搶購熱。而女主角宋慧喬喺劇中所佩戴過嘅飾物同時亦都賣到斷市。

不過噚日喬妹方面就話有份贊助《太陽》嘅珠寶飾物品牌就冇經喬妹允許而用咗喬妹嘅肖像賣廣告，令到喬妹無辜被代言，所以就委託律師代表向珠寶品牌提出侵肖像權嘅提告。

根據喬妹嘅律師代表話：「呢個珠寶飾品公司之前曾經同宋慧喬簽訂咗代言協議，但係呢份代言協議已喺今年1月到期，而該公司最近仍喺官網，網上使用宋慧喬嘅照片進行宣傳，已經侵犯咗宋慧喬嘅肖像權。雖然該珠寶飾品公司係宋慧喬出演嘅《太陽的後裔》贊助商之一，但這並不等於該公司就可以唔經允許使用宋慧喬嘅形象進行商業宣傳。」喬妹方面仲話之後所得嘅賠償將會全數捐畀新晉珠寶設計師嘅學院或學校。

而呢個品牌唔係第一次被喬妹告，早於2013年亦都試過未經允許使用電視劇中喬妹嘅鏡頭而被告上法庭。

另外，珠寶品牌得知喬妹方面話要告佢哋後，今日珠寶品牌方面都即刻出嚟回應話佢哋去年10月同《太陽》方面簽訂咗合約，亦都畀咗巨額贊助費，而合約中係講明可以用劇照做宣傳，所以並冇侵權。同時品牌亦話於前年至去年間向喬妹畀咗逾2千萬港元嘅酬勞做代言人，但因為之後發生喬妹逃稅事件，品牌指當時因為喬妹嘅負面形象令佢哋品牌有所影響，指當時喬妹事實上已違反合約，又話當時喬妹要求續約，但佢哋就冇答應。而珠寶品牌又指摘喬妹拍攝《太陽》時冇經品牌同事就利用自己造型師嘅飾物，但造型師嘅品牌就冇贊助劇集，但卻依然用劇照來宣傳，覺得咁樣係令佢哋受到利益上嘅損失。

不理解宋慧喬方面主張的演員除了收取片酬，亦要同時收取肖像權費的說法。