嚟緊又到一年一度嘅父親節，民主黨許智峯為人子亦已為人父，最近發生咗件事令佢對呢個節日感受特別深。阿峯從政以來不時抗爭，肢體衝突以至被保安抬走都係閒事，但佢最近發現經常腰骨痛，早排的起心肝睇醫生，被診斷患上周杰倫都有嘅強直性脊椎炎，屬於遺傳病，而佢爸爸同叔叔都有呢個病，醫生同佢講病徵屬於初期，要多做運動，如果不幸惡化，就有機會脊椎僵直或者變形。

阿峯同八方講，爸爸一年都會病發四、五次，有時會痛到落唔到床，佢見到都好心痛；到佢確診，作為爸爸嘅梗係仲擔心啦！阿峯形容爸爸係「好COOL嘅暖男」，平時好內斂，但為家人默默付出。佢自言出身基層，爸爸喺蔬菜統營處打工，但為咗供佢同姐姐去外國升學，辛苦到打兩份工，試過兼職看護、投注站接線生等工作。

佢最記得每次選舉，爸爸一定陪喺身邊等開票，去年立法會選舉，爸爸仲拖住裝滿傳單嘅篋，行勻港島公眾街市幫佢拉票，要數最「經典」一幕，係佢第一次喺中西區區議會被抬走，當時爸爸得知後殺上區議會，搵正副主席同民政事務專員理論，阿峯笑言：「諗返起都有啲羞家，好似學生哥畀人蝦，要老豆出頭。」

暖男爸爸上月底60大壽，阿峯為佢準備咗個驚喜，就係叫晒成個家族嘅人齊齊整整食飯，連在澳洲嘅姐姐都專登飛返來，成功令爸爸感動到眼濕濕呀。