TVB新聞部自從羅燦、張剛同謝彩雲三巨頭劈炮唔撈之後,好多高級嘅職位仍懸空,八方有一次撞到新話事人、助理新聞總監袁志偉,問佢重有冇裁員壓力,佢阿哥話,唔只冇,重要請番啲人㖭。言下之意佢唔止已達到六嬸慳家標準,肯定有過之而冇不及。
咁呢個世界永遠係有人辭官歸故里,有人漏夜趕科場,花仔(袁志偉外號)亦知道要快快搵人做嘢,八方聽聞,下個月三號,前馬會大公關盧愛玲會走馬上任,填補彩雲嘅空缺,當無記新聞部經理,咁當然有房坐,所謂世界輪流轉,盧小姐當年做過TVB記者,今日回朝歸隊,重做咗高層。盧小姐見慣大場面,做過新聞處、報館同雜誌,又跑過立法會,經驗夠晒,英文又勁。
無記𠵱家嘅總採主係徐忠明,採主有魏綺珊、李德成、許方輝、黃淑明、阮大可、廖忠平等等;另外,張克超亦獲升做公共事務部高級監製,花仔老拍檔葉惠民則當上編輯主任。
傳真︰2623-9278
電郵︰
[email protected]