由墨西哥金像導演吉拿域戴拖路（Guillermo del Toro）執導嘅2013年《悍戰太平洋》（Pacific Rim）憑口碑大受歡迎，相隔5年上映嘅《悍戰太平洋2：起義時空》（Pacific Rim：Uprising）就換來Steven S. DeKnight執導，今次大隊分別到大陸及澳洲取景，呢次續集為瞄準中國市場，全套戲都不難發現陣陣大陸味。

先係演員陣容，今集由《星球大戰》（Star Wars）系列男星約翰保也加（John Boyega）拍住奇連伊士活（Clint Eastwood）兒子史葛伊士活（Scott Eastwood）拍檔抗敵，而強國女星景甜更擔大旗飾演重要角色邵立雯（Liwen Shao），呢次佢扮演擁有高智商但性格冷漠嘅女強人，仲有張晉同埋趙雅芝兒子黃愷傑等，片中出現大量普通話及簡體字，當然亦唔少得植入式廣告。

景甜喺開場十幾分鐘就出場，以一個好cool嘅女強人look出場，大家都以為佢係奸，點知景甜救世界都唔止，仲救埋John Boyega。

戲中景甜大部份時間都係講普通話，有幾場係講英文，而且英文又講得唔差嘅。佢嘅戲份，由頭帶到尾，而佢每次出場，都令觀眾精神為之一「震」，例如ending講佢突然幫手作戰，鏡頭一轉，景甜已經連髮型都轉埋，由紮髻變長髮，仲係好明顯一早set晒頭嗰隻，戲院內即傳來陣陣笑聲……

由於電影獲某大陸品牌啤酒贊助，片中出現一場兩位男主角飲呢個牌子嘅場面，就連約翰保也加打開雪櫃，入面都係好多支呢個牌子啤酒，加上《悍戰太平洋2》喺強國上映會同呢個牌子有大量crossover，簡直同老是常出現嘅景甜互相輝映。

反觀上集女主角菊地凜子就要慘死，而著名影星千葉真一兒子新田真劍佑都係新丁駕駛員之一，但就發揮機會不及黃愷傑。

《悍戰太平洋2》擺明要打中國市場，電影噚日於大陸開畫首天即破1.4億人民幣，直至今日中午12點幾，累積票房更多達2億人民幣，看來景甜好大機會繼續演出《悍戰太平洋3》。

精選娛聞，喺晒《娛果》
http://fb.com/appledailyent