每年嘅漫畫節、亞洲遊戲展都係機迷引頸以待嘅朝聖掃貨日子，估唔到四川大地震嘅不幸事件，令到呢兩個遊戲界盛事，變相提前咗今個月舉行。話說SonyPlayStation嘅老細James噚日打畀小妹，話因為四川地震，遊戲界喺呢個月8號同9號中午12點至7點，喺海港城舉行四川賑災義賣大行動。

James話，今次義賣除咗Sony外，Microsoft嘅Xbox360都力撐，而參加嘅遊戲機公司多達50間，陣容比暑假嘅漫畫節同年底嘅亞洲遊戲展仲大，義賣最新嘅遊戲軟件、虛擬寶物等，變相香港game界兩大盛事提前舉行。屆時會賣2,000個福袋，每個50蚊，個個唔同，入邊有唔同遊戲精品、漢堡包券等，好彩嘅買中有價值200蚊遊戲碟，值回票價；另提前發行嘅遊戲碟100蚊起，平均七折促銷義賣。
James仲講，PS會推出歷來最勁，原計劃暑假推出嘅PS3戰爭遊戲碟試玩，「隻game原本7月先喺日本亮相，但同總公司傾過，為咗賑災，破天荒喺香港率先曝光。」其他活動仲有Cosplay服裝義租同影相、網上遊戲慈善賽，「總之所有收入，全部捐畀宣明會賑災。」
電郵：mailto:[email protected]
逢周六、周日刊出