林作今年2月正式放棄大律師執業，轉投教育界及娛樂圈。前日中學文憑試DSE放榜，6位出爐狀元同時立志做醫生，林作之後在facebook貼文：「每年我都要講一次，讀書最勁嘅人去晒做醫生同律師，非香港之福。」他又批評各人是「思想狹隘（narrow-minded）的讀書機器，難有大成就、自慰式（masturbatory）咁埋首喺自己狹窄專業世界嘅一日。」隨即被網民怒插。

照嘆紅酒

林作前晚在電話中堅持為言論企硬：「我所講嘅自慰式，其實係好西方嘅講法，我特登寫埋masturbatory呢個字，西方嚟講，呢種講法唔止係sexual，同時係講自high嘅嘢，你自己覺得做到好開心，但其實對世界完全冇影響，所以我今日特別有註解呢個字。」他續謂：「香港社會如果最精英嘅人去做醫生，就係設立緊壞例子，因為真正做公共事務，去貢獻社會，就會唔見咗好多叻嘅人，剩番啲弱雞嘅渣人，庸才當道，呢個係好危險。」
雖然忙於回應網民，但前晚9時多，林作仍有空與友人去中環食法國菜兼嘆紅酒，直至晚上11時多仍未離開，林作在電話中表示那些是他英國讀書同學。