【新增動新聞】
「波仔」得米加盟湖人，又係「波叔」出場時間啦！NBA選秀會周四舉行，UCLA控衛朗素波爾（Lonzo Ball）一如所料成為「榜眼」加盟湖人，言行出位嘅老竇拿化波爾（LaVar Ball）自然風騷，48歲嘅佢賽前已經「林鄭上身」，揚言「以宙斯同耶穌之名」知道囝囝一定會加盟湖人，又晨早預備定湖人紫金色系嘅自家品牌Big Ball Brand「cap帽」，賽後仲即刻推出495美元（約3,860港元）嘅「ZO2: SHO'TIME!」波鞋，好彩佢冇撻Q咋…

湖人球迷未必頂得順拿化波爾「亂up廿四」，但佢喺波仔中選後呢句就幾啱聽：「我同你講咗，我一早就知呢件事會發生，由朗素係bb嗰陣開始！過去19、20年都係！朗素將會喺新秀年帶領湖人殺入季後賽，到時再嚟話我知佢打成點，我就會戴住另一頂cap帽同你講：『我一早講咗啦！』」對於老竇咁講法，朗素波爾就話：「呢個當然係目標，你唔會未打先認輸。」

不過，教練禾頓（Luke Walton）就似乎有意為事件降溫：「我份人好樂觀，但我未睇到咁長遠。目前我只希望朗素幫球隊贏到幾場夏季聯賽，我哋到時由嗰度開始。」至於憑狀元籤選中富斯（Markelle Fultz）、唔使同朗素波爾做隊友嘅賓西蒙斯（Ben Simmons）同艾比迪（Joel Embiid），亦就波叔嘅言論係twitter「唱雙簧」，一個簡潔咁話「黐線（crazy pills）」，Jojo直情揚言：「請你喺佢面前大力鋤樽，鋤到佢老竇入場拯救佢。」