中大新亞書院之第二十六屆錢賓四先生學術文化講座今年由新亞校友陳志新之個人基金贊助，在四月十二日舉行。陳志新係現任新亞校友會會長，中大校友評議會主席兼中大校董、新亞書院校董，一九七二年畢業於經濟系，因經營貨船航運發達，十幾年來捐錢俾母校贊助文史哲學術活動，例如中華美德教育，今年仲承諾永久支持錢賓四先生學術文化講座，值得一讚，抵佢名下隻馬「中華寶寶」來價唔算貴，但已經贏咗七場，久唔久就爆冷。
今年之講者係邊位呢？一睇，少有啲噃，就係桂林街時代入讀新亞，一九五八年於外文系（一九六○改稱英文系）畢業嘅孫述宇校友。孫校友當年曾獲雅禮獎學金到耶魯大學深造，得英國文學博士學位後，返新亞英文系教書，後參與創立中大翻譯系，早期研究興趣在中國古典小說，係「水滸傳」專家，著作有「小說內外上下卷」、「金瓶梅的藝術」、「水滸傳的來歷與藝術」，近年多研究古代英語，英語的來源與演變，今次應邀回校主持講座，一共有三次公開演講。
（一）四月十二日第一講：「英文字母怎樣讀？」主持人係陸潤棠教授，上午十一時三十分於中大逸夫堂。
（二）四月十七日第二講：「從鶯鶯傳到紅樓夢」，主持人係樊善標教授，下午四時三十分於中大李兆基樓一號演講廳。
（三）四月二十日第三講：「歷史與傳統：中國人要學怎樣的英文？」主持人係中大翻譯系主任陳善偉教授，於尖沙嘴香港歷史博物館演講廳。
以上三講，以廣東話主講。歡迎公眾人士出席，不收任何費用，但要留位登記，打電話：3943-7944搵曾嘉欣小姐或3943-8615搵林嘉敏小姐。
左丁山在新亞時常與年輕孫教授交談，年青時覺得新亞學生可到英文系全美國第一嘅耶魯大學讀英文博士，不可思議，視為神仙人物，多接觸後，發覺孫先生講說話低聲細氣，和藹可親，做新亞校友會理事，親自貼郵票寄信俾校友，全無架子，不過自問與佢嘅學術差距太大，從來唔敢同佢講學問之事，今次佢難得回港公開演講，佢昔日之學生故舊必然踴躍聽講。