內地國寶級體操王子李小雙紆尊降貴，應領匯邀請，將於農曆年期間來港到公屋商場樂富中心進行示範表演，幫領匯催谷商場人流。據悉佢將於下月2日抵港。
商業運作嘅領匯𠵱家都要與時並進，農曆年黃金檔期佢哋梗唔會放過。新地旗下商場早於2004年時，就搵嚟中國藝術體操隊等來港獻技，但從未出現有國寶級運動員示範嘅「商場騷」！
領匯噚日大鑼大鼓宣傳農曆年期間，將斥資一千二百萬元進行賀歲推廣，較上年多出四百萬蚊，重頭戲係邀得國寶級著名體操運動員李小雙，連同四名獲獎無數嘅體操隊精英：趙玉超、韓友亮、徐潤及陳亮來港作示範表演，搞旺個場。有興趣嘅市民可於下月4日下午到樂富中心，欣賞自從1996年亞特蘭大奧運會後，已因傷病退出體操隊嘅李小雙風釆。佢只演一日咋！