所謂「時間就係金錢」，所以有好多美國人認為，想將來嘅生活富足，唔一定要省吃儉用；相反，只要識得使少少錢，將吃力不討好嘅瑣事交畀人做，如一般家務、家居維修、報稅、個人理財，甚至湊仔女返學、放學等工作都搵人代勞嘅話，就可以剩番更多私人時間。如果能夠好好利用呢啲時間進行其他投資或者讀書增值，長遠就可以賺取更高回報。
喺《WebWorkerDaily》討論區，AnneZelenka非常同意花錢將雜務交畀其他人做，「自己唔鍾意做嘅嘢，諸如打掃執屋、排隊交雜費等，最好就係請家務助理代勞，慳番多啲時間陪家人、消遣娛樂甚至瞓覺，有助平衡工作同家庭生活。」

LogicalExtremes亦贊同：「我會花錢請人做所有自己認為難頂嘅工作，好似家居清潔、維修等，等我可以留番啲氣力做其他更重要嘅事。不過，凡係有關個人財務嘅事，由於涉及私隱，我就覺得應該親力親為嘞！」
事實上，搵私人助理幫手，唔單止可以減輕在職人士嘅額外工作負擔，仲可以增加就業機會，但要請到合適嘅人選，亦絕對唔係易事。
AnneZelenka留言話：「想請到一個真正幫到自己嘅人，其實都要花一段幾長嘅時間。所以如果想搵幫手嘅話，一定要趁想做嘅工作仲未堆積如山之前，就開始物色合適人選。」
Rick馬上將佢嘅難忘經歷公諸同好：「公司曾經請咗個全職秘書畀我，等我一心以為有人可以幫我分擔部份工作，點知實情係佢根本幫唔到手，累我反而仲要嘥更多精神同佢合作，費時失事。」