2010年開始無耐，一眾基金與大小炒家已經急不及待重新部署，最明顯是昨日一眾資源股與航運股齊齊喪升，前者受惠通脹前景與美元反彈乏力，事實上市場過多紙幣已是共識，只不過資金未真正喪炒一眾商品而已。至於後者，航運股去年是跑輸大市股之一，今年假如經濟稍好，以航運股的槓桿，隨時升到你唔信。
商品股之中，市場只是將焦點放在金礦股，其實銅價才升得最勁，過去一年銅價升幅達到130%，以過去3個月計，亦升逾25%，相比同期金價升幅，過去一年升約3成，過去3個月升12%，簡直完全係兩回事，不過，江西銅業（358）過去半年只不過在20元樓下橫行，假如銅價再上，升幅不得了。

資金追捧農業股

除資源股外，資金亦大炒農業股，過去兩日升幅唔簡單，以第一拖拉機（038）為例，過去兩日累升兩成，超大現代（682）過去兩日亦勁升兩成，其他化肥股不相伯仲，就連橙汁概念，市場亦頗受落，海升果汁（359）過去兩日雖僅累升16%，但過去3個月計，其股價其實已升近倍。
假如橙汁期貨繼續升，主要從事橙汁加工的果汁股其實受惠有限，真正種橙股，香港原來只得一隻，就是超大現代分拆出來的亞洲果業（073），可惜受累介紹上市天價事件，股份形象頗為負面，但睇睇佢盈利預測，會估到股價現水平係咪抵買。亞果昨收7.15元，升9.3%。
歐陽風