鴻運為愛琴海岸搞嘅「買樓送車」，噚日抽獎。效無綫台慶壓軸送車形式，要三十幾個愛琴內購買家，揀匙開車門定得主。
買家逐個對住個匙窿狂插猛擰，祈求幸運之神眷顧。旁邊鴻運同新地嘅人，特別係新地Eric周國賢，忘情咁為佢地打氣。
頭幾位都開唔到，直至中獎機會有九分一嘅梁小姐，攞匙嗰陣已緊張到有啲手震，聽到「嚓」一聲後，即時肢體失控，重喜極而泣，喊到差啲收唔到聲。周圍嘅人亦為佢高興，鼓掌祝賀，又笑又叫。
二十幾歲嘅梁小姐話今次係第一次買樓，又係第一次中獎，又唔怪得佢失晒儀態嘅。佢用130萬買咗3座中層688方呎單位，部車會自己用，因為住愛琴海岸有車方便好多，但重未決定揀乜色。
另鴻運田國強話，第二部車會喺公開發售時，送畀經鴻運經手嘅買家，每部值成12.9萬㗎。

黑色星期五多記者會
今日係黑色星期五，但竟然有七個記者會，好似從未有咁多。當中五個係代理搞，兩個係發展商搞嘅。睇嚟代理之間同發展商，要片到七彩先至搶到傳媒採訪。對記者嚟講，要跑晒咁多單都幾係嘢。
另外，高力國際今日喺香港舉行展銷會，推售新西蘭威靈頓假日酒店，聽講發展商重提供五年每年8厘淨租金回報保證㖭，認真夠膽。